Դ ԹԱԳԱՎՈՐԱՑ24
- 1Նորա օրերումը Բաբիլոնի Նաբուգոդոնոսոր թագաւորը վեր եկաւ. Եւ Յովակիմը ծառայ եղաւ նորան երեք տարի, եւ դարձեալ նորանից ապստամբուեց։
- 2Եւ Տէրը նորա վերայ ուղարկեց Քաղդէացիների գունդերը, եւ Ասորիների գունդերը, եւ Մովաբացիների գունդերը եւ Ամմոնի որդկանց գունդերը, եւ նորանց ուղարկեց Յուդայի վերայ, որ նորան փչացնէ Տիրոջ այն խօսքին համեմատ, որ խօսել էր իր ծառաների՝ մարգարէների ձեռով։
- 3Սակայն սա Տիրոջ պատուէրի համեմատ եղաւ Յուդայի դէմ, որ նորան մերժէ իր առաջիցը Մանասէի մեղքերի համար՝ այն բոլորի համար, որ արել էր։
- 4Նաեւ անմեղ արիւն էր թափել եւ Երուսաղէմը լցրել էր անմեղ արիւնով. Եւ Տէրը չ’ուզեց ներել։
- 5Եւ Յովակիմի գործերի մնացորդը եւ նորա բոլոր արածը, ահա նորանք բոլորը գրուած են Յուդայի թագաւորների յիշատակաց գրքումը։
- 6Եւ Յովակիմը ննջեց իր հայրերի հետ, եւ նորա որդի Յովաքինը թագաւոր եղաւ նորա տեղ։
- 7Եգիպտոսի թագաւորը այլ եւս դուրս չ’եկաւ իր երկրիցը. Որովհետեւ Բաբիլոնի թագաւորը Եգիպտոսի հեղեղատիցը մինչեւ Եփրատ գետը առաւ բոլորը ինչ որ Եգիպտոսի թագաւորինն էր։
- 8Տասնեւութ տարեկան էր Յովաքինը, երբոր թագաւոր եղաւ եւ երեք ամիս թագաւորեց Երուսաղէմումը, եւ նորա մօր անունն էր Նեհուսթա՝ դուստր Երուսաղէմացի Եղնաթանի։
- 9Եւ նա չարութիւն արաւ Տիրոջ աչքի առաջին բոլորովին իր հօր արածին պէս։
- 10Այն ժամանակը Բաբիլոնի Նաբուգոդոնոսոր թագաւորի ծառաները վեր եկան Երուսաղէմ, եւ քաղաքը պաշարման մէջ ընկաւ։
- 11Եւ Բաբիլոնի Նաբուգոդոնոսոր թագաւորը եկաւ քաղաքի վերայ, եւ նորա ծառաները նորան պաշարել էին։
- 12Եւ Յուդայի Յովաքին թագաւորը դուրս եկաւ Բաբիլոնի թագաւորի դէմ իր մօր եւ իր ծառաների եւ իշխանների եւ իր ներքինիների հետ, եւ նորան բռնեց Բաբիլոնի թագաւորը իր թագաւորութեան ութերորդ տարին։
- 13Եւ այնտեղից հանեց Տիրոջ տան բոլոր գանձերը եւ թագաւորի տան գանձերը, եւ կոտրատեց այն բոլոր ոսկի անօթները, որ Իսրայէլի Սողոմոն թագաւորը շինել էր Տիրոջ տաճարումը, ինչպէս որ Տէրը ասել էր։
- 14Եւ գերի փոխադրեց բոլոր Երուսաղէմին եւ բոլոր իշխաններին եւ բոլոր քաջազուններին՝ տասը հազար գերի եւ բոլոր հիւսերին եւ դարբիններին. Ոչ ոք չ’մնաց բացի ժողովրդի աղքատներից։
- 15Եւ գերի փոխադրեց Յովաքինին Բաբիլոն, եւ թագաւորի մօրը եւ թագաւորի կնիկներին եւ նորա ներքինիներին եւ երկրի զօրաւորներին գերի տարաւ Երուսաղէմից Բաբիլոն։
- 16Եւ բոլոր զինուորներին՝ եօթը հազար, եւ հիւսերին եւ դարբիններին՝ հազար, բոլոր քաջերին, պատերազմ անողներին Բաբիլոնի թագաւորը գերի տարաւ Բաբիլոն։
- 17Եւ Բաբիլոնի թագաւորը նորա հօրեղբօրը՝ Մաթանիային թագաւոր շինեց նորա տեղ, եւ նորա անունը փոխեց Սեդեկիա։
- 18Քսանեւմէկ տարեկան էր Սեդեկիան, երբոր թագաւոր եղաւ եւ տասնեւմէկ տարի թագաւորեց Երուսաղէմումը եւ նորա մօր անունն էր Ամիտաղ՝ դուստր Լեբնացի Երեմիայի։
- 19Եւ նա չարութիւն արաւ Տիրոջ աչքի առաջին բոլորովին Յովակիմի արածին պէս։
- 20Որովհետեւ Տիրոջ բարկութիւնը Երուսաղէմի եւ Յուդայի դէմ էր, մինչեւ որ նորանց մերժէ իր երեսի առաջից։ Եւ ապստամբուեց Սեդեկիան Բաբիլոնի թագաւորի դէմ։